Bengaluru: ತುಳುವ ಮಹಾಸಭೆ ಇಂಟರ್‌ನೇಷನಲ್
ಬೆಂಗಳೂರು ವಲಯೊಗು ಪೊಸ ಸಾರಥ್ಯೊ
ಅಧ್ಯಕ್ಷೆರಾದ್ ಪುರುಷೋತ್ತಮ ಚೇಂಡ್ಲ
ಪ್ರಧಾನ ಸಂಚಾಲಕರಾದ್ ಶಾಂತಾರಾಮ್ ವಿ. ಶೆಟ್ಟಿ , ಪ್ರಧಾನ ಕಾರ್ಯದರ್ಶಿಯಾದ್ ಶಿವಾನಂದ ಸಾಲ್ಯಾನ್
Bengaluru: ತುಳುವ ಮಹಾಸಭೆ 2028ಗ್ ಶತಮಾನೋತ್ಸವನ್ ಆಚರಣೆ ಮಲ್ಪುನ ಪೊರ್ತುಡು ತುಳು ಚಳುವಳಿ, ತುಳು ಬಾಸೆ, ಸಾಹಿತ್ಯೊ, ಕಲೆ, ಸಂಸ್ಕೃತಿ ಬೊಕ್ಕ ತುಳುವರೆನ ಸಂಘಟನೆನ್ ನನಲ ಗಟ್ಟಿ ಮಲ್ಪುನ ಉದ್ಧೇಶೊಡ್ದು ಸುರು ಮಲ್ತಿನ ತುಳುವ ಮಹಾಸಭೆ ಇಂಟರ್‌ನಾಷನಲ್ದ ಬೆಂಗಳೂರು ವಲಯೊಗು ಪೊಸ ಪದಾಧಿಕಾರಿಲೆನ್ ನೇಮಕ ಮಲ್ತ್‌ದೆರ್.
ಶ್ರೀ ಪುರುಷೋತ್ತಮ ಚೇಂಡ್ಲ – ಅಧ್ಯಕ್ಷೆರ್, ಶ್ರೀ ಶಾಂತಾರಾಮ್ ವಿ. ಶೆಟ್ಟಿ – ಪ್ರಧಾನ ಸಂಚಾಲಕೆರ್, ಶ್ರೀ ಶಿವಾನಂದ ಸಾಲ್ಯಾನ್ – ಪ್ರಧಾನ ಕಾರ್ಯದರ್ಶಿ.
ಪುರುಷೋತ್ತಮ ಚೇಂಡ್ಲ – ಸಂಘಟನಾ ಕ್ಷೇತ್ರೊದ ಅನುಭವಿ, ಬೆಂಗಳೂರುಡು ಸ್ವಂತ ಉದ್ಯಮೊ ನಡಪಾವೊಂದುಪ್ಪುನ ಶ್ರೀ ಪುರುಷೋತ್ತಮ ಚೇಂಡ್ಲ ಆರ್, ಮೈಸೂರು ವಿಶ್ವವಿದ್ಯಾಲಯೊಡ್ದು ಬಿ.ಕಾಂ ಪದವಿ ಪಡೆದ್, ಬಿಸಿನೆಸ್ ಅಂಡ್ ಇಂಡಸ್ಟ್ರಿಯಲ್ ಮ್ಯಾನೇಜ್‌ಮೆಂಟ್ ಬೊಕ್ಕ ಲೇಬರ್ ಲಾ ವಿಷಯೊಲೆಡ್ ಮಿತ್ತ್‌ದ ಶಿಕ್ಷಣೊ ಪಡೆತ್‌ದೆರ್. ದಿ ಕೇಂಪ್ಕೋ ಲಿಮಿಟೆಡ್‌ಡ್ ಏರಿಯಾ ಸೇಲ್ಸ್ ಮ್ಯಾನೇಜರ್ ಆದ್ ಸೇವೆ ಮಲ್ತ್ದ್ ಸ್ವಯಂ ನಿವೃತ್ತಿ ಪಡೆತ್‌ದೆರ್.
ತುಳು–ಕನ್ನಡ ನಾಟಕೊಲೆನ ರಚನೆ, ನಿರ್ದೇಶನೊ ಬೊಕ್ಕ ಅಭಿನಯೊಡು ಆಸಕ್ತಿ ಉಪ್ಪುನ ಆರ್, ಮಸ್ತ್ ಸಂಘಟನೆಲೆಡ್ ಮಸ್ತ್ ಕಷ್ಟೊಡ್ದು ಸೇವೆ ಮಲ್ತ್‌ದೆರ್. ಕುಲಾಲ ಸಂಘೊಡು ಕಾರ್ಯದರ್ಶಿಯಾದ್ ಬೊಕ್ಕ ಮೂಜಿ ಸರದಿಡ್ ಅಧ್ಯಕ್ಷೆರಾದ್, ಸುಮಾರ್ 35 ವರ್ಷೊ ಕಾಲ ಕಾರ್ಯಕಾರಿ ಸಮಿತಿಡ್ ಸೇವೆ ಮಲ್ತ್‌ದೆರ್. ತುಳುವೆರೆ ಚಾವಡಿ ಬೆಂಗಳೂರುದ ಸ್ಥಾಪಕ ಉಪಾಧ್ಯಕ್ಷೆರಾದ್ ಬೊಕ್ಕ ಒರುಂಭ ವರ್ಷೊ ಕಾಲ ಅಧ್ಯಕ್ಷೆರಾದ್ ಸೇವೆ ಮಲ್ತ್ದ್, ಇತ್ತೆ ಗೌರವಾಧ್ಯಕ್ಷೆರಾದ್ ಉಲ್ಲೆರ್. ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸಮಿತಿ ಸದಸ್ಯೆರಾದ್ಲಾ ಸೇವೆ ಮಲ್ತ್‌ದೆರ್.
ಆರೆನ ಸಂಘಟನೆ ಬೊಕ್ಕ ಸಮಾಜಸೇವೆನ್ ತೂದು ಶ್ರೀ ಸಾಯಿರಾಮ್ ಸೇವಾರತ್ನ, ಸಂಘಟನಾ ಬ್ರಹ್ಮ ಬಾಲೋಡಿ ಮಹಾಬಲ ಹಾಂಡ, ತುಳುನಾಡ್ದ ಬೊಳ್ಳಿ, ಕರ್ನಾಟಕ ನಾಡ ಪೋಷಕ, ಕರ್ನಾಟಕ ಕಲಾ ಸಂಪದ, ಕುಲಾಲ ಕಿರೀಟ, ಬಲಿಯೇಂದ್ರ ಪುರಸ್ಕಾರ ಬೊಕ್ಕ ಸಮಾಜ ಸೇವಾರತ್ನ ಇಂಚ ಮಸ್ತ್ ಪ್ರಶಸ್ತಿಲು ತಿಕ್ದ್‌ನ್.
ಶಾಂತಾರಾಮ್ ವಿ. ಶೆಟ್ಟಿ – ಸಾಹಿತ್ಯೊ ಬೊಕ್ಕ ಸಂಗೀತೊದ ಸೇವಕೆ, ಉಡುಪಿದ ಶ್ರೀ ಶಾಂತಾರಾಮ್ ವಿ. ಶೆಟ್ಟಿ ಆರ್ ವಿಜ್ಞಾನ ಪದವೀಧರರಾದ್, ಬೆಂಗಳೂರುಡು ಸ್ವಂತ ಉದ್ಯಮೊ ನಡಪಾವೊಂದುಲ್ಲೆರ್.
ತುಳು ಸಾಹಿತ್ಯೊ, ಸಂಗೀತೊ, ಬಾಸೆ ಬೊಕ್ಕ ಸಂಸ್ಕೃತಿದ ಕ್ಷೇತ್ರೊಡು ಸಕ್ರಿಯರಾದ್ ಉಲ್ಲೆರ್. ಆರೆನ ‘ಮಣ್ಣ ಬಾಜನ’ ಕವನ ಸಂಕಲನೊಗು ತುಳು ಅಕಾಡೆಮಿದ ಪುಸ್ತಕ ಪ್ರಶಸ್ತಿ ತಿಕ್ದ್‌ದ್, ಆರ್ ಮೈಸೂರು ದಸರಾ ಕವಿಗೋಷ್ಠಿಡ್ ಮೂಜಿ ಸರದಿ ಪಾಲ್ ಪಡೆತ್‌ದೆರ್.
ಐಲೇಸಾ – ದಿ ವಾಯ್ಸ್ ಆಫ್ ಓಷನ್ ಸಂಸ್ಥೆದ ಸ್ಥಾಪಕ ಸದಸ್ಯೆರಾದ್ ತುಳು ಸಂಗೀತೊದ ಜಾಗತಿಕ ಪ್ರಚಾರೊಗು ಬೇಲೆ ಮಲ್ತೊಂದುಲ್ಲೆರ್.
ಸಂಗೀತ ಸಾಮ್ರಾಟ್ ವಿ. ಮನೋಹರ್ ಆರೆನೊಟ್ಟುಗು ಸುಮಾರ್ 35 ತುಳು ಪದೊಲೆನ್ ಬುಡುಗಡೆಗ್ ತಯಾರ್ ಮಲ್ಪುನ ಬೇಲೆಡ್ ಉಲ್ಲೆರ್. ಗ್ಲೋಬಲ್ ಅಲಯನ್ಸ್ ಆಫ್ ತುಳು ಅಸೋಸಿಯೇಷನ್ ಮುಖೇನಲಾ ತುಳು ಬಾಸೆದ ಮೂಲ ಸ್ವರೂಪೊನ್ ಒರಿಪಾದ್ ಬುಲೆಪಾವುನ ಬೇಲೆಡ್ ಈಡೇರ್ದೆರ್. ಹಿರಿಯ ಸಾಧಕೆರೆನ್ ಗೌರವ ಮಲ್ಪುನ ‘ವಯೋ ಸಮ್ಮಾನ್’ ಯೋಜನೆದ ಮುಖೇನಲಾ ಸಾಹಿತ್ಯೊ, ಸಂಗೀತೊ ಬೊಕ್ಕ ಬಾಸೆದ ಕ್ಷೇತ್ರೊದ ಹಿರಿಯರೆನ್ ಸನ್ಮಾನೊ ಮಲ್ಪುನ ಬೇಲೆ ನಡಪಾವೊಂದುಲ್ಲೆರ್.
ಶಿವಾನಂದ ಸಾಲ್ಯಾನ್ – ಯುವ ಸಂಘಟನೆದ ಶಕ್ತಿಯಾದ್ ಉಡುಪಿ ಜಿಲ್ಲೆದ ಕಾಪು ತಾಲೂಕುದ ಬಂಟಕಲ್ಲು ಗ್ರಾಮೊದ ಶ್ರೀ ರಾಜ ಪೂಜಾರಿ ಬೊಕ್ಕ ಶ್ರೀಮತಿ ಪುಷ್ಪ ಪೂಜಾರಿ ದಂಪತಿಲೆನ ಮಗೆಯಾಯಿನ ಶ್ರೀ ಶಿವಾನಂದ ಸಾಲ್ಯಾನ್ ಆರ್ ಎಂ.ಎಸ್.ಆರ್.ಎಸ್. ಕಾಲೇಜ್, ಶಿರ್ವಡ್ ಮಿತ್ತ್‌ದ ಶಿಕ್ಷಣೊ ಪಡೆತ್‌ದೆರ್.
ನೆಲಮಂಗಲದ ಆಸ್ಕೋ ಸ್ಟೀಲ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಡ್ 26 ವರ್ಷೊದ ಮಸ್ತ್ ಸಮಯೊದ ಸೇವೆ ಮಲ್ತ್‌ದಿನ ಆರ್, ಇತ್ತೆಲಾ ಅಲ್ಪನೇ ಸೇವೆ ನಡಪಾವೊಂದುಲ್ಲೆರ್. ಬೆಂಗಳೂರುದ ಬಿಲ್ಲವ ಸಂಘದ ಕಾರ್ಯಕಾರಿ ಸಮಿತಿ ಸದಸ್ಯೆರಾದ್, ಬಿಲ್ಲವ ಯುವ ಘಟಕದ ಅಧ್ಯಕ್ಷೆರಾದ್ ಬೊಕ್ಕ ಕ್ರೀಡಾ ಘಟಕದ ಅಧ್ಯಕ್ಷೆರಾದ್ ಸೇವೆ ಮಲ್ತ್‌ದೆರ್. ಪವರ್ ಫ್ರೆಂಡ್ಸ್ ಬೆಂಗಳೂರು (ರಿ.) ಸಂಸ್ಥೆದ ಅಧ್ಯಕ್ಷೆರಾದ್ ಮಸ್ತ್ ಕ್ರೀಡಾ, ಸಾಂಸ್ಕೃತಿಕ ಬೊಕ್ಕ ಸಮಾಜಮುಖಿ ಲೇಸ್‌ಲೆನ್ ನಡಪಾದ್ ಕೊರ್ತ್‌ದೆರ್.
ತುಳು ಬಾಸೆದ ಮಾನ್ಯತೆಗಾದ್ ನಡತಿನ ಹೋರಾಟೊಲೆಡ್ ಪಾಲ್ ಪಡೆತ್‌ದಿನ ಆರ್, ಕಂಬಳ ನಿಷೇಧದ ವಿರುದ್ಧ ಟಿ. ದಾಸರಹಳ್ಳಿಡ್ದ್ ಫ್ರೀಡಂ ಪಾರ್ಕ್‌ಮುಟ್ಟ ನೂರೆಡ್ಡ್ ಜಾಸ್ತಿ ಯುವಕರೆನ್ ಸೇರಾವೊಂದು ಬೃಹತ್ ಬೈಕ್ ರ್ಯಾಲಿ ನಡಪಾದ್ ಕಂಬಳೊಗು ಬೆಂಬಲ ಕೊರ್ತ್‌ದೆರ್.
ಬೆಂಗಳೂರುದ ಯುವಕರೆಗ್ ಉದ್ಯೋಗೊದ ಸೌಲಭ್ಯೊ ಕೊರ್ಪುನೆತ್ತ ಒಟ್ಟುಗು, ಕಷ್ಟೊಡುಪ್ಪುನಕ್ಲೆಗ್ ನೆರವಾಪುನ ಮುಖೇನ ಸಮಾಜಮುಖಿ ಸೇವೆಡ್ಲಾ ಗುರುತಿಸಾವೊಂದೆರ್.
ಈ ಮೂಜಿ ಜನ ಪೊಸ ಪದಾಧಿಕಾರಿಲೆನ ಅನುಭವೊ, ಸಂಘಟನಾ ಶಕ್ತಿ ಬೊಕ್ಕ ತುಳು ಬಾಸೆ–ಸಂಸ್ಕೃತಿದ ಮಿತ್ತ್‌ದ ಮೋಕೆನ್ ಗಲಸೊಂದು ಬೆಂಗಳೂರುದ ತುಳುವರೆನ್ ಸಂಘಟನೆ ಮಲ್ತ್ದ್, ತುಳು ಬಾಸೆ, ಸಾಹಿತ್ಯೊ, ಕಲೆ, ಸಂಗೀತೊ, ಸಂಸ್ಕೃತಿ ಬೊಕ್ಕ ಪರಂಪರೆನ್ ಒರಿಪಾವುನೆಗ್ ಬೊಕ್ಕ ಬುಲೆಪಾವುನೆಗ್ ಜಾಸ್ತಿ ಶಕ್ತಿ ಕೊರ್ಪೊ.
ಈ ನೇಮಕನ್ ತುಳುವ ಮಹಾಸಭೆ ಇಂಟರ್‌ನೇಷನಲ್‌ದ ಅಂತರರಾಷ್ಟ್ರೀಯ ಅಧ್ಯಕ್ಷೆರಾಯಿನ ಶ್ರೀ ಸರ್ವೋತ್ತಮ ಶೆಟ್ಟಿ ಬೊಕ್ಕ ಕರ್ನಾಟಕ ರಾಜ್ಯಾಧ್ಯಕ್ಷೆರಾಯಿನ ಶ್ರೀ ದೇವೇಂದ್ರ ಹೆಗ್ಡೆ ಕೊಕ್ರಾಡಿ ನೇಮಕ ಮಲ್ತ್ದ್, ಪದಾಧಿಕಾರಿಲೆಗ್ ಅಭಿನಂದನೆಲು ಬೊಕ್ಕ ಎಡ್ಡೆಪ್ಪುನ್ ಬಯಕ್ದೆರ್.
ಅಂಚನೆ ತುಳುವರ್ಲ್ಡ್ ಫೌಂಡೇಶನ್‌ನ ಗೌರವಾಧ್ಯಕ್ಷೆರಾಯಿನ ಶ್ರೀ ಶ್ರೀಹರಿನಾರಾಯಣದಾಸ ಅಸ್ರಣ್ಣ ಕಟೀಲ್, ಅಧ್ಯಕ್ಷೆರಾಯಿನ ಶ್ರೀಮತಿ ಭಾನುಮತಿ ಶೆಟ್ಟಿ ಕಕ್ವಗುತ್ತು ಬೊಕ್ಕ ನಿರ್ದೇಶಕೆರಾಯಿನ ಡಾ. ರಾಜೇಶ್ ಕೃಷ್ಣ ಆಳ್ವ ಆರ್ ಪೊಸ ಪದಾಧಿಕಾರಿಲೆನ್ ಅಭಿನಂದನೆ ಮಲ್ತ್ದ್, ಅಗಲ್ನ ಸೇವೆಡ್ದ್ ಬೆಂಗಳೂರು ವಲಯೊಡು ತುಳು ಸಂಘಟನೆ ನನಲಾ ಗಟ್ಟಿಯಾವಡ್ ಪಂದ್ ಅಭಿನಂದನೆ ಮಲ್ತ್‌ದೆರ್.
– ತುಳುವ ಮಹಾಸಭೆ ಇಂಟರ್‌ನ್ಯಾಷನಲ್ ತುಳುವರ್ಲ್ಡ್ ಫೌಂಡೇಶನ್ ಕಟೀಲ್